RUS
SMARTNEWS.KZ басылымының хабарлауынша, 13 қараша күні Алматыда «Қазақ аруы-2024» байқауы дүркіреп өтті. Жеңімпазды халық дауыс беру арқылы таңдаған. Алайда желіде байқау әділетсіз өтті деген адамдардың саны көбейді.
Жыл сайын Баян Алагөзова ұйымдастырып жүрген «Қазақ аруы» байқауының биылғы қорытындысында Қызылорданың тумасы 17 жастағы Ақкербез Ысқаққызы жеңімпаз атанды. Оған тәж және арнайы шапан тағылды.
Дауыс берушілердің 30,04%-ы Ақкербез Ысқаққызына дауыс берген.
Ал екінші орынды Алматы қаласының тумасы Ақерке Серікжан иеленсе, үшінші орын алматылық Назерке Мырзағалиеваға бұйырған.
Биыл байқаудың бір ерекшелігі – жеңімпазды халық таңдауына қалдырған. Себебі бұған дейін кім Қазақ аруы атанатынын қазылар алқасы анықтаған. Алайда желі қолданушылары байқаудың ұйымдастыру деңгейіне наразы болды. Олар Telegram бот істемей, дауыс берілмей қалғанын айтады. Сол себепті желі қолданушыларының көп бөлігі жеңімпаз әділ анықталмады деп санайды.
“Халықты алдап не керегі бар еді! Одан гөрі жюридің шешімімен болғаны дұрыс еді. Адамдардың сезімдерімен ойнағандай соншама жұрт дауыс бере алмай дал болды”, “Ақкербез жеңсе жеңсін, бірақ неге сол қызға ғана дауыс қабылданып, қалған қатысушыларға дауыс қабылданбады?”, “Көреалмаушылық емес. Бірақ биыл ең әділетсіз және қызықсыз өткен “Қазақ аруы” болды. Қазылар алқасы жиналып, ең лайықты адамды таңдағаны дұрыс еді” деп жазды желідегілер.