АҚШ-тағы боксшы Данияр Елеусінов Астанадағы спорт мектебінен жалақы алып отырған
Данияр Елеусінов Астанадағы спорт мектебінен тұрақты жалақы алып келген. Бұл туралы smartnews.kz сайты ktk.kz сайтына сілтеме жасап хабарлайды.
Бірнеше жылдан бері АҚШ-та тұратын танымал боксшы, олимпиада чемпионы Данияр Елеусінов Астанадағы №3 олимпиадалық резервтің мамандандырылған балалар-жасөспірімдер спорт мектебі КММ-де жаттықтырушы лауазымы бойынша тұрақты түрде жалақы алып келген.
KTK дерегінше, Астана қалалық спорт басқармасы Данияр Елеусіновтің 2021 жылдан бері жаттықтырушы лауазымында жұмыс істейтінін растаған.
- Елеусінов Данияр Маратұлы Астана қаласы әкімдігінің №3 олимпиадалық резервтің мамандандырылған балалар-жасөспірімдер спорт мектебі КММ-де жаттықтырушы лауазымында. Жалақысы – 80 249 теңге. Елеусінов Данияр жартылай штаттық негізде жұмыс істейді, - делінген Астана дене шынықтыру және спорт басқармасының баспасөз қызметінің мәліметінде.
Данияр Елеусіновтің өзі спорт мектебіндегі жұмысына былтыр, яғни жаңа жылдың алдында келген. Жұрт оның АҚШ-та жүріп Қазақстандағы мектепте қалай сабақ беріп жүргеніне таң қалды.
- Ол енді қалада болғанда үнемі залда ғой. Жаттығулары бар, біздің балалармен бірге жаттығады. Бүкіл әдіс-тәсіл, соққы, бәрін көрсетіп, залда істейді. Соңғы рет желтоқсанда болды. Оның алдында Данияр ешқайда шықпады ғой, - дейді Астана әкімдігінің №3 олимпиадалық резервтің мамандандырылған балалар-жасөспірімдер спорт мектебінің директоры Мұрат Мұстафин.
Сондай-ақ мектеп директоры Мұрат Мұстафин чемпион жас спортшылармен онлайн байланысқа жиі шығып тұрады дейді.