«Анасын іздеп келген жоқ»: Бельгияда Жәнібекке қатысты тың дерек пайда болды

SMARTNEWS басылымының хабарлауынша, «Бармысың, бауырым?» хабарының редакциясы Қазақстанның Бельгиядағы елшілікке жолдаған хатына жауап келді.

Бағдарлама елшілікке 2 сауал қойған. Біріншісі - «Жәнібек Жұмағұловты асырап алған Бельгиялық келіншектің есебі неге түгел емес?». Екіншісі - «Жәнібекті асырап алған Бельгиялық келіншек бірнеше рет медициналық емдеу мекемесіне жатқызылған. Сол жылдары Қазақстанның Бельгиядағы елшілігі, Қазақстанның Сыртқы Істер Министрлігі баланың жағдайынан хабардар болған ба? Егер мемлекеттік органдар хабардар болса, қандай шешім қабылданды?».

Қазақстанның Бельгиядағы Төтенше және Өкілетті елшісі Марғұлан Баймұханнан келген жауапты Қымбат Досжан оқып берді:

«Хат мазмұнында Жәнібек Жұмағұлов көмек сұрап, Бельгиядағы елшілікке жүгінбегені жазылған. Бұл мәлімет бұған дейін де бізге белгілі болатын. Өйткені, Жәнібектің айтуынша, бала 16 жасында асырап алған адамнан бөлек кетіп, кәмелеттік жасқа толғанда тіпті Испанияға кетіп қалған. Сондықтан анасын іздеп, Испаниядан келген болатын. Елшілік хатындағы екінші мәлімет: бала асырап алу орталығы өкілінің хабарлауынша, Жәнібектің асырап алынуы асырап алу агенттіктерінің қатысуынсыз, жеке, тікелей болды. Сондай-ақ, осы орталықтың өкілі бұл бала кәмелетке толғандықтан, қандай да бір есептерді, ақпаратты сұрауға немесе осыған байланысты қадамдар жасауға құқы жоқ дегендей жауап алдық», - деді журналист.