RUS
SMARTNEWS басылымының хабарлауынша, кеше Астана қаласындағы №9 мамандандырылған «Зерде» дарынды балалар мектебі физика пәнінен «Әлихан Серікзатұлы Мақсұт» атындағы мектепішілік олимпиада өткізді. Бұл туралы ақын Серікзат Дүйсенғазы айтты.
Олимпиадаға қырықтан астам мектеп оқушылары қатысқан.
«Былтыр көктемде Оқу-ағарту министрі Ғани Бейсенбаевтың қабылдауында болғанымда осы мектептің ғимараты туралы мәселе көтерген едім. Марқұм балам Әлихан мектепте олимпиадаға дайындалатын физика мен роботехника лабораториясы жоқ екенін айтып жүретін. Өзім де кездесулерге, ата-аналар жиналыстарына барғанымда арнайы акт залдарының жоқ екенін, спорт залдарының тарлығын көріп көріп көңілім түсетін.
Ғани Бектайұлы іскер, ұлжанды, үлкен жүректі азамат қой. Берген уәдесінде тұрып жақында «Зерде» мектебі заманауи техникамен жабдықталған жарқыраған жаңа ғимаратқа қол жеткізді», - деді ақын.
Ақын мектептегі лаборатория ұлының атына берілгенін айтты.
«Ғимаратқа кіргенде көңілім шалқып, көзіме жас келді. «Аруағыңнан айналайын, құлыншағым-ай!» деп іштей бір егіліп алдым. Айтарға сөз жоқ, ертегі әлеміндей ғажап енді. Ішіндегі физика лабораториясын Әлиханның атына беріп, керек жарағын жасақтап жатыр екен. Алла қаласа, көктем шыға мектептің айналасы абаттандырылып, ресми ашылу салтанаты болады. Соған барлығымыз барып қатысармыз», - деді ақын.