RUS
SMARTNEWS.KZ басылымының хабарлауынша, Астанада самбодан әлем чемпионаты өтіп жатыр. Аталған додаға келген Ресей спортшылары формаларын кимеген, ал журналистері киімдегі Ресей туын скотчпен жасырып жүрген көрінеді.
Журналистердің өз киімдеріндегі Ресей туын ақ жапсырмамен жасырып жатқан сәтін спорттық блогер Анық Көкенайұлы өзінің Facebook-парақшасында жариялаған. Оның айтуынша, ресейлік БАҚ өкілдерін мұндай қадамға ешкім мәжбүрлемеген.
«Самбодан әлем чемпионатына келген ресейлік 2 журналист киімдеріндегі Ресей туын көрсетпей жауып тастады. Бұларды ешкім мәжбүрлемеді. Өз еріктерімен осындай қадамға барды.
Жалпы әлем чемпионатында Ресей және Беларусь туы байқалмады. Спортшылары да өз елдерінің туы бар форма кимеген», - деп жазды блогер.
Айта кетейік, Ресей мен Беларусь балуандары жарысқа «ФИАС» (Fédération Internationale Amateur de Sambo, Халықаралық самбо федерациясы) атымен қатысып жатыр. Астанадағы самбодан әлем чемпионатында ФИАС-1 құрамында тек Ресей спортшылары болса, ФИАС-2 құрамында Беларусь балуандары. Тиісінше олар өз елдерінің туын желбіретпесе де, федерация атынан қатысқан боп есептеледі.
Негізі санкцияға байланысты Ресей мен Беларуське халықаралық спорттық жарыстарға қатысуға тыйым салынған. Бұл 2022 жылы Украинаға соғыс ашқаннан кейін пайда болған қағида. Биылғы Париж Олимпиадасында да бұл екі елдің спортшылары өз елдерінің атынан емес, «нейтрал статуста» қатысқан еді. Жарыстарға қатысуға санкция жарияланғанмен, сол олимпиада ойындарына Беларусьтен 28, ал Ресейден 54 спортшы барған.