Атырауда отшашудан тұрғын үй қабырғасынан өрт шықты

1 қаңтар түнгі 2:33 шамасында Атырау қаласы Нұрсая ықшамауданы Елорда даңғылы бойында орналасқан үйдің қаптамасынан өрт шыққаны туралы хабар түскен. 

Шақырту орнына жеткен өрт сөндірушілер 9 қабатты «Family» тұрғын үйінің сыртқы қамтамасының ашық отпен жанып жатқанын анықтады.

Мамандар шұғыл түрде өрт сөндіру жұмысын жүргізіп, жалынның тұрғындар тұратын бөлігіне ұласуына жол бермеді.

Тілсіз жаудан 9 қабатты тұрғын үйдің 250 шаршы метр болатын сыртқы қамтамасы (полифасад) жанып кетті.

«Өрт сағат 03:17-де оқшауланып, 03:19-де толық сөндірілді. Зардап шеккендер жоқ. Өрттің шығу себебі анықталып жатыр. Құрметті атыраулықтар, өрт қауіпсіздігі талаптарын қатаң сақтауды сұраймыз» деп хабарлады ТЖД баспасөз қызметі. 

Әлеуметтік желіде жалынның пиротехникадан шыққаны туралы болжамдар айтылып жатыр. 

Айта кетейік, отты сөндіруге ТЖД 53 қызметкері, 8 техника жұмылдырылды.