RUS
SMARTNEWS.KZ басылымының хабарлауынша, әлеуметтік желілерде өзін емші деп атайтын атыраулық ер адамның тоғыз жасар қыздан шайтанды қуып жатқан бейнеролигі тарады. Қоғамда резонанс тудырған бейнероликке елдегі Бала құқықтары жөніндегі уәкіл Динара Закиева пікір білдірген.
Видеода екі ер адамды байқауға болады. Олардың бірі емші. Ол еденде жылап жатқан қызды ұстап, оған сұрақтар қояды. Бейнежазбада кішкентай қыздың ішіне 19 жастағы Ләззат есімді ұрғашы жынның кіріп кеткені айтылған.
Желі қолданушылары қазақ «экзорцистін» қатаң сынның астына алды.
«Сұмдық, қайдан шыққан орта ғасыр, қандай жындар өзі? Қайдағы жын шығару? Байғұс қыз шырылдап жылап жатыр ғой!»
«Мынау не?! Кәмелетке толмаған баланы қорлау ғой нағыз?!»
«Үңгірдің әдет-ғұрыптары ма? Қыздың психикасына ешқашан жазылмайтын жара қалдырды-ау!», – деді желі қолданушылары.
Қазақстандағы Бала құқықтары жөніндегі уәкіл Динара Закиева да өзінің Instagram парақшасында видеоға қатысты пікір білдірді.
«Бұл іс бойынша ІІМ, өңірлік уәкілдермен жұмыс істейміз. Алдын ала емшінің жеке басы және баланың орналасқан жері анықталды. Ақпарат тексеріліп, барлық жағдайлар анықталуда», - деп жазды ол.
Атырау облысындағы Бала құқықтары жөніндегі уәкіл Айжан Сәрсембаева «Ақ Жайыққа» берген сұхбатында қыздың Алматыда тұратынын айтқан. Сондықтан бұл істі Алматы облысы бойынша уәкіл басқармақ.
«Қазіргі уақытта емші Атырау облысында тұратыны белгілі. Бірақ ол бүкіл Қазақстанды аралап қызмет көрсетеді екен», – деп қосты ол.
Құқық қорғау органдары емшімен әңгіме жүргізгені белгілі болды. Алайда ол қыздың аты-жөнін есіне түсіре алмаған. Өйткені ол кішкентай бүлдіршін «көп «пациенттерінің» бірі» екенін айтқан.