RUS
Жақында елордадағы «Шаңырақ» мейрамханасында белгілі қаламгер Төлен Тілеубайдың «Түлкілітаудың аспаны» атты жаңа кітабының тұсауы кесілді.
Салтанатты жиынға абылайтанушы және мағжантанушы ғалым, Қазақстанның еңбек сіңірген қайраткері, Қазақстан жоғары мектебі ұлттық академиясының академигі Зарқын Тайшыбай, Қазақстанның еңбек сіңірген қайраткері, «Астана ақшамы» газетінің бас редакторы Еркін Қыдыр, ақын, журналист, Парламент Мәжілісінің депутаты Жанарбек Әшімжан, алаштанушы ғалым, Л.Гумилев атындағы Еуразия ұлттық университетінің Журналистика және әлеуметтік ғылымдар факультетінің деканы Қайрат Сақ, Қазақтың сары тентегі атанған айтыскер ақын, бард Қуаныш Мақсұтов, ақын, журналист Айбатыр Сейтақ, алаштанушы ғалым, медиа сарапшы, Туризм және спорт министрлігінің ресми сайтының редакторы Мейрамхан Жәпек, автордың сыныптасы, талантты суретші Дәулет Ізбасаров, зиялы қауым өкілдері және оқырман қауым қатысты.
Тұсаукесерді айтыскер ақын, ғалым-ұстаз, филология ғылымдарының кандидаты Айтбай Жұмағұл жүргізді. Жаңа кітаптың тұсауы кесілгеннен кейін азаматтар қаламгерге бір-бір ауыз жылы лебізін айтып, шығармашылығына табыс тіледі.
«Төлен Тілеубай үшін 50 жас үлкен белес болды. 28 маусымда Ақордада Мемлекет басшысының қолынан ҚР Президентінің БАҚ саласындағы сыйлығын алды. Соның алдында «Аманат» партиясының «Аманат Медиа сыйлығы-2023» бәйгесінде жүлдегер болды. Ол сыйлықты Мәжіліс төрағасы Ерлан Қошановтың өзі табыс етті. 23 қазанда Республика күні қарсаңында «Ерен еңбегі үшін» медалімен марапатталды. Осының бәрі Төленнің өзінің ақ адал еңбегімен келген дүние.
2000-шы жылдардың басынан шыққан «Жас қазақ» ұлттық апталық газетінде қызметтес болдық. Төленнің журналист ретінде есімін елге мәлім еткен кезеңдер сол еді. «Жас қазақтың» елордадағы қосынын басқарып, жауынгер қалемгері болды. Одан беріде «Астана ақшамы» газетінде табысты еңбек етіп келеді. Бұл той «Елорда Ақпарат» медиа холдингіне де ортақ қуаныш. Төленді төртінщі кітабының шығуымен құттықтай отырып, шығармашылық жолда табыс тілейміз! Аман жүр, жазарың көп болсын! Қазақ журналистикасының дамуына бір адамдай үлес қосып жүрген азамат ретінде абыройың өсе берсін дегім келеді. Ердің жасы елуің құтты болсын!», – деді жиында жүрекжарды лебізін жеткізген Жанарбек Әшімжан.
Қазақ журналистикасында ширек ғасырлық межеде өз қолтаңбасын қалыптастырған журналистің бұл туындысы – әдебиет әлеміне жасаған қадамы. Кітап авторды жазушылық қырынан ашып көрсетеді. Жинаққа «Түлкілітаудың аспаны» атты тұңғыш повесі мен әңгімелері енген. Шығармаларға ауыл баласының арман-мұраты, жастардың мөлдір сезімі, адамгершілік, адалдық, мейірім арқау болған. Кітап мектеп жасындағы балаларға және көпшілік қауымға арналған.
Жаңа кітап Қарағанды қаласындағы «Tengri» баспасынан 1000 данамен жарыққа шықты. Төлен Тілеубайға әдебиет әлеміне жасаған қадамың құтты болсын дейміз! Кітаптың оқырмандары көбейе берсін!
Шапағат ӘБДІР