RUS
SMARTNEWS.KZ басылымының хабарлауынша, хиджаб киюді мәжбүрлейтін Иран билігіне қарсы шығып, университет кампусында іш киіммен жүрген қызды полиция ұстап әкетіп, жындыханаға қамаған.
Amnesty Iran құқық қорғау ұйымы құзырлы органдарға студентті дереу және шартсыз босату туралы ашық үндеу жасады.
Иран билігі 2 қарашада Тегерандағы Азад ислам университетінде күзетшілердің хиджаб киюді мәжбүрлі түрде міндеттейтініне наразылық білдіру үшін киімін шешкеннен кейін күштеп қамауға алынған университет студентін дереу және шартсыз босатуы керек, — делінген хабарламада.
Ұйым қамаудағы қыздың құқығын таптамауға, яғни оны «азаптамай, зорламай», толықтай хақын қорғауға шақырды. Қыздың отбасымен байланысуына, сондай-ақ адвокат алуға мүмкіндік беру туралы талап қойды.
Белгілі болғандай, университет күзетшілері хиджабты дұрыс кимегені үшін қызға тиіскен көрінеді. Мәжбүрлі түрде хиджаб кигізетін биліктен, жиі қайталанатын ескертулерден, ерлердің қорлығынан шаршаған студент көптің көзінше әдейі шешініп тастаған.
Студенттер университет аудиториясының терезелерінен түсірген оқиғаның бейнежазбасы әлеуметтік желілерде тез таралып, Иран қоғамында айтарлықтай резонанс тудырды. Көптеген қолданушылар әйелге қолдау білдіріп, оның әрекетін батылдық пен өжеттікке теңеді.
Ұсталған адамның жеке басы туралы ақпарат әлі жарияланған жоқ. Бірақ университеттің жергілікті газеті қыздың психикалық ауруханаға жіберілгенін айтқан.