RUS
SMARTNEWS.KZ басылымының хабарлауынша, Испаниядағы нөсер жауынның салдарынан болған су тасқыны Валенсия провинциясының аумағын түгел жайпап өтті. Дүниенің жарасы жеңіл, өкініштісі, тасқын кезінде 200-ден астам адам ажал құшты. Бұның бәріне қара халық биліктің әрекетсіздігі мен немқұрайлығын кінәлады.
3 қараша күні Испаниядағы монархияны бастарып отырған патша Филипп VI мен әйелі тасқын болған орынға келген еді. Валенсия провинциясындағы Пайпортаға келгендері сол-ақ екен, оларды тасқыннан зардап шеккен, барынан айырылған қаралы халық қарсы алды.
Сурет: EFE/Biel Aliño, Adolfo Benetó
Патша мен оның әйелі Летисия, Испанияның үкімет басшысы Педро Санческе және Валенсия автоном бірлестігінің басшысы Карлос Масонға «Қанішер, Филипп!», «Кетіңдер!», «Сендерді лағынет атсын!» деп айқайлады. Сабырға шақырған король Филипп VI-ті қоршаған тұрғындар оған тас атып, балшық лақтырды. БАҚ өкілдерінің оқиға орнындағы суреттерінен байқасақ, көпшіліктің лақтырған лай-балшығы патшаның беті мен киіміне дөп тиген.
Сурет: EFE/Biel Aliño, Adolfo Benetó
Одан бөлек, лауазымдыларды сол жерде жиналғандар күрекпен, таяқпен қорқыта бастады. Күзетшілер ел басшыларын қоршап, қолшатырмен жауып, топ арасынан тез шығуға тырысқан. Жағдайға атты полицейлер араласып, испан билігінің мәртебелілеріне араша түскен.
Сурет: EFE/Biel Aliño, Adolfo Benetó
Испаниядағы RTVE телерадиокомпаниясының дерегінше, көңіл айта келген монархтың тұрғындармен кездесуі ушығып кеткен соң, өңірдегі сапарын жоспарланған уақытқа қарағанда ерте аяқтап, кетіп қалған.
Сурет: EFE/Biel Aliño, Adolfo Benetó
Айта кетейік, 30 қазанға қараған түні Испанияның бірқатар аймақтарында бір жылдық мөлшердегі жауын-шашын бірнеше сағат ішінде құйып жауған. Су мен балшық ағыны көпірлерді қиратып, көліктер мен адамдарды, тіпті жекеленген ғимараттарды өзімен бірге ағыспен алып кеткен. Аман қалғандар мыңдаған тұрғын жарықсыз отыр, тіпті ауыз су мен азық-түлік тапшы болғасын аш-жалаңаш қалды. Нөсердің салдарынан кемінде 217 адам қайтыс болған. Тасқында жоғалғандар көп болғандықтан қайтыс болғандар санын әзір нақты есептеу мүмкін болмай отыр.
Халық жаңбырдың салдары туралы Валенсия автономының билігі тым кеш хабарлағаны үшін ызалы. Патша билігі де көптеген елді-мекендерге бірнеше күн ішінде көмек көрсетілмегені үшін қатаң сынға ұшырады. Кейбір аудандарға бару әлі де мүмкін емес көрінеді. Сондықтан ол өңірлерге құтқару операциясы үшін арнайы әскерилер тартылған.