RUS
Smart News басылымының хабарлауынша, Мақпал Жүнісова Instagram парақшасында "Зәкеңнің батасы" деп параққа жазылған өлең жолдарын жариялаған.
Заманбек Нұрқаділовтің өз қолымен жазылған бата 2005 жылдың 26 тамызында жазылған. Бұл саясаткер қайтыс болардан 3 ай бұрынғы уақыт.
Байқамаппын салмағын,
Өмір зілін, жалғанын.
Махаббат бар деп өзіңмен
От боп лаулап жанғанмын.
Жаным енді төзерсің,
Тағдырдың басқа салғанын,
Жақсы басар жаманды
Алла айтар талғамын.
Жаратқан ием қолдаса,
Күшейтер саған қорғанын.
Жау жеңіліп, сен жеңіп
Үзерсің шынжыр торларын.
Әсем ән әлі құлпыртар
Жарық айдың толғанын.
Елің көрер ертең-ақ
Мерей сендей болғанын.
Сендерге қидым қайшымен
Ғұмырымның қалғанын.
Өнерді мәңгі алғасың,
Алла берсін жалғасын!
Әумин!
Еске сала кетсек, Заманбек Нұрқаділов танымал саясаткер, қоғам қайраткері болған. Әр жылдары Алматы қалалық атқару комитетінің төрағасы, Алматы қаласының, кейіннен Алматы облысының әкімі қызметтерін, сондай-ақ Парламент Мәжілісінің депутаты қызметтерін атқарған.
2005 жылдың 12 қарашасында Заманбек Нұрқаділов өз үйінде денесіндегі атылған үш оғымен өлі күйінде табылды. Екі оқ кеудесіне тиген, біреуі басына тиген. Болған оқиғаның ресми нұсқасы бойынша ол өз-өзіне қол жұмсаған деп танылды.