RUS
Ерікті, әрі блогер Ырысбала Икрамбайдың көмек көрсетіп жатқан Оралбекова Гүлжан Қыдырбайқызына ауданда тиісті көмектер көрсетілмей келген. Блогер жылу жинап, жәрдем көрсетілмек болған Оралбекова төрт баланы асырап отырған жалғызбасты ана.
Блогер Шардара ауданының Алатау батыр ауылына Оралбековаға көмек көрсетуге келген соң ғана, ауыл әкімі отбасыға көмек көрсетілетіні туралы тапсырма берген. Сондай-ақ Шардара ауданының адами әлеуетті дамыту бөлімі балалардың біреуін мектеп формасы және оқу құралдарымен қамтамасыз ету үшін 40567 теңге берілмек. Ал қалған балаларға "Мектепке жол" акциясы арқылы демеушілер көмек көрсетпек.
Десе де, Ырысбала Икрамбай дәл осы 40567 теңге жәрдем ақының тек бір балаға берілуіне наразы болды.
- Құрметті Шардара ауданының адами әлеуетті дамыту бөлімі! Сіздер жазған нөмірі 64 қаулыны оқып шықтық. С.Кәттабеков мектебінің қамқоршылық кеңесі неге бұл отбасының 1 баласына ғана 40567 теңге берілген? Түркістан облысы әкімдігі! Шардала ауданы Алатау батыр ауылындағы әкесінен айырылған, анасы жұмыссыз отбасындағы мектеп жасындағы 3 баланың неге тек 1 балаға 40567 беріледі? Қалған екі бала жапырақ байлап бара ма, сабақты тасқа қашап жаза ма? С.Кәттабеков атындағы жалпы орта мектебінің қамқоршылық кеңесі, мұндай шала қамқорлықтарыңыздың себебі неде? - деген сауал жолдады блогер.
Аталған Оралбекованың мәселесінен кейін блогер аудандағы әділетсіздікті тізіп кетті. Блогердің айтуынша, жастар дипломы мен білімі болса да, ауданда жұмыс таппай жүрген.
- Әлі де менің қолыма билік тимесін деп тілеп қойыңыздар. Түбімен қопарамын. Кемені жүгімен, түйені түгімен жегендердің бәрін құстырушы едім. Сатылған су, жер, жұмыс орындары, үкіметтен бөлінген, талан-тараж болған қаражат, судың да сұрауы болуы керек шығар. Мектепке комиссия, тексеріс келсе мұғалімдерден ақша жинап кітапханаға, директордың үйіне дастархан жайып, ішкізіп-жегізіп, қалғанын қалтасына салып жіберетін ескі системаларыңызды маған жасай алмаушы едіңіздер, Шардара ауданындағы барлық мектеп директорлары, - дейді блогер жеке Instagram парақшасында.
Айта кетсек, Ырысбала Икрамбай - 2 жылдан бері 80-ге жуық мұқтаж, көп балалы отбасыларға асарлатып баспана алып берген, сондай-ақ науқастарға жылу жинаған танымал блогер. Блогердің "Ырысты" қайырымдылық қоры арқылы елдегі әртүрлі мұқтаж отбасыларға көмек көрсетіледі.