RUS
Шымкенттегі Romantic гүл дүкенінің директоры таңертең желіге видео жариялады. Әйел видеода Астанаға жергілікті құзырлы органдардан қашып келгенін айтады.
- Қазір мен Астанадамын. Шымкенттен кетіп қалдым. Себебі Шымкентте өзімді қауіпсіз сезіне алмадым. Маған қатты қысым көрсетіліп жатыр. Тіпті отбасыма да. Алдымен барша Қазақстандықтарға алғыс айтқым келеді. Сіздердің арқаларыңызда ұрылардың арасында жергілікті сақшының бары анықталды. Сіздер полиция жасамаған істі жасадыңыздар. Әзірге Шымкент полициясы мен прокуратурасы істі жабуға тырысып жатқанда, сіздер оларға жұмыс істеуге үлкен әсер еттіңіздер, - дейді дүкен иесі.
Еске сала кетсек, Romantic гүл дүкенінің директоры 8 тамызда 242GDA17 нөмірлі көлікпен келген бір топ адам гүл ұрлап кеткенін хабарлап, дүкендегі камераға жазылған бейнежазбаны желіге жариялады. Дүкен иесі топ арасында облыстық прокурордың баласы бар дегенмен, прокуратураның баспасөз қызметі аталған адамның ведомствоға ешқандай қатысы жоғын айтты.
Артынша прокурордың баласы деген адам учаскелік полицей екені белгілі болды. Жағдайға қатысты ішкі істер министрлігі де пікір білдіріп, екінші видеодағы ер адамның 1989 жылы туған Б. есімді азамат екенін растады.
Желі қолданушылары әйелдің жариялаған видеосынан кейін ІІМ мен Бас прокуратураның жағдайды анықтап, дүкен директорына араша түсуді сұрап жатыр.