RUS
Көпшілік көптеп барған тарихи драма “Міржақып. Оян, қазақ!” барлық кинотеатрда көрсетілімін тоқтатты. Көрермендер бұған наразылығын білдіріп, туындыны түсірген түсірілім тобына өтінішін жасап жатыр.
Десе де, фильмнің режиссері әрі сценаристерінің бірі Мұрат Есжан көрсетілімнің тоқтауына былай жауап берді:
“Міржақып. Оян, қазақ!” фильмі кестеде неге жоқ деген сұрақтар таң атқалы көптеп келіп жатыр. Шығармашылық топ, яғни, біз прокатпен айналысқан жоқпыз, десе де, мына нәрсені айтқым келеді. Фильм 21 қыркүйектен бастап тура екі апта бойы кинотеатрларда көрсетілді. Негізі прокат мерізімі өткен жексенбі аяқталған болатын, алайда көпшіліктің сұранысына байланысты 4 қазанға дейін ұзартылды.
Жалпы, 6 сериялы телехикаядан көркем фильм жасау, оны үлкен экран арқылы көпшілікке ұсыну “Қазақстан” телерадиокорпорациясының тікелей идеясы мен ұсынысы болатын. Ол үшін алғыстан басқа айтарымыз жоқ. Сондықтан прокат мерізімінің аяқталуынан қандай да бір астар іздеп, тараптарды кінәлаудың орны жоқ деп санаймын.
Уақыты мен қаржысын қиып, келген, көрген, таратқан барша көрерменге алғысымыз шексіз!, - дейді режиссер.
Режиссердің айтуынша фильм жақында «Qazaqstan» арнасының эфирінде, сондай-ақ онлайн-платформаларға шығатынын жеткізді.