RUS
SMARTNEWS.KZ басылымының хабарлауынша, Хасан Қасымбаевты қолдап жүрген билік басындағы туыстары туралы ақпаратты ер адам жіпке тізгендей қып айтып берген. Тіпті ақпарат желіде ескен соң Парламент Сенатының депутатының өзі де Хасанмен туыс екенін мойындады.
Әлеуметтік желіде тараған бейнежазбада ер адам «Хутор бандасы» туралы әңгімелеп, Хасан Қасымбаевтың жоғарыдағы қорғаушы туыстары туралы шындықты әшкерелеген. Сөзінше, оның өзі де бұрын дәл осы қылмыстық топтан жәбір көрген. Әділдік сұрап, прокуратураға да арыз жазған. Бірақ еш нәтиже болмаған.
Алматы облысынан сайланған, Парламент Сенатының депутаты Жүргембаев Жанболат пен бауыры Жүргембаев Мұхтар - - сол Хасанның туысы. Мұхтар - заңгер, Әділет генерал-майоры.
Қазір біздің ауыл әкімі де соның туысы. Досымбаев Нұрбол деген адам (Талғар ауданы, Белбұлақ ауылының әкімі - ред.).
Бұлардың түбі сол Астанада, билікте отыр. Бұлардың барлығы да осы қылмысты ұйымдасып жасайды. Қолында билігі барлар осы Хасанды қорғап отыр.
Хасанды тек қазір ғана қамап жатыр ғой. Олар кезінде менің де ізіме түсіп, өлтіреміз деп қорқытқан, - деді тұрғын.
Аталған ақпарат Telegram-дағы арналардың бірінде де тараған еді.
«Біздің дереккөздеріміздің мәліметінше, Мұхтар Жүргенбаев қамауға алынған Хасанның бөлесі, аналары бірге туған. Қазіргі тергеу кезінде оның болған жағдайға қатысын тексеріп жатыр», - деп жазылған «Чемодан госсекретов» Telegram-арнасында.
Әлеуметтік желіде Жүргембаевтар мен Қасымбаевтың туыстығы туралы ақпарат тараған соң Tengrinews.kz сенатор Жүргембаев Жанболаттан осы жайтқа қатысты мән-жайды сұраған.
Менің ағайыным болып келетінін растаймын, облыста алыс туыстарымыз көп. Қазақтарда, өздеріңіз білетіндей, туыс көп. Бірақ бізде тұрақты байланыс болған жоқ. Әрі кетсе той немесе жаназада кездесіп қалатынбыз. Сондықтан менің тарапыма айтылып жатқан сөздердің бәрі жала жабу және мен оларды сотқа беруге құқылы екенімді еске саламын, - деді Жүргембаев.
Сондай-ақ сенат депутаты «Талғар аудандық әкім аппаратының басшысы Аслан Қасымбаевтың лауазымын сақтап қалуға сенатор туысы ықпал етпек болған» деген ақпаратты жоққа шығарды.
Талғар аудандық әкім аппаратының бұрынғы басшысы Аслан Қасымбаевтың қызметін сақтап қалуы үшін ешкімге және ешқайда хабарласпағанымды сеніммен айта аламын. Хасан Қасымбаевты тергеу ісіне де мүлде араласқан емеспін, - деп түйіндеді ол.
Бұған дейін Жоғарғы соттың бұрынғы төрағасы, сенатор Жақып Асанов та Хасанның туысы деген ақпарат тараған. Бірақ Асановтың Қасымбаевпен туыстық жақындығын жоққа шығарғаны туралы жазған едік.