RUS
Smart News басылымының хабарлауынша, күйеуінің қолынан қаза тапқан Салтанат Нүкенованың ағасы Қайрат Нүкенов қарындасының өліміне қатысты айтылмаған деректерді ақтарды.
Қайрат Нүкенов YouTube желісіндегі Ертісбаев Live арнасының "Прямо по Кунаева" бағдарламасына берген сұхбатында Қуандық Бишімбаевтың өз қылмысын қалай жасырмақ болғаны туралы айтып берді.
“Қуандық пен Салтанат арасындағы жайт 9 қараша күні болған. Қарындасым Салтанат ресторанның вип-залынан шықпай қойған. Менің ойымша, дәл сол уақыттарда қарындасым көз жұмған болуы мүмкін.
Және дәл сол күні түстен соң Бишімбаев мейрамханаға бір қызды шақырған екен. Біздің білуімізше, ол әкелген қыз Салтанатқа қатты ұқсайтын көрінеді. Ол қызды ресторанға шақырып, оны да көршілес вип-залда шамамен бір жарым сағат ұстаған.
Одан бөлек дәл осы уақытта Бишімбаев қарындасымның барлық әшекейлерін шешіп алған. Салтанаттың әшекейлері Бишімбаевты ұстау кезінде табылды.
Бишімбаевтың інісі болса, Салтанаттың сырт киімдері мен жаңа киімдер алып келген. Соған қарағанда Бишімбаев Салтанатқа ұқсайтын қызды шақырып, Салтанаттың киімдерін кигізіп, әшекейлерін таққызып ресторанның камераларында Салтанат мейрамханадан өзі шығып кеткен секілді көрсеткісі келген болуы керек. Біздің күдігіміз осы”, – дейді Салтанаттың ағасы.
Сондай-ақ Салтанаттың ағасы Қайрат Нүкенов қайғылы оқиғадан кейін Бишімбаевтар кешірім сұрады ма деген сұраққа да өз жауабын берді.
“Болған оқиғадан кейін туыстары Павлодарға келді. Павлодардан Бишімбаевтың әкесі мен Қайрат деген ағасын көрдім. Сосын олар Астанаға қайтты. Қазір 12 желтоқсан ғой, бірақ осы күнге дейін татуласайық деп кешірім сұрап алдымызға ешкім келген де жоқ”, – деді Қайрат Нүкенов.