RUS
SMARTNEWS.KZ басылымының хабарлауынша, 17 жастағы Жібек Құлымбетова джиу-джитсу мен грэпплингтен 11 дүркін әлем чемпионы атанып, жетістіктерімен әлемдегі спорт сүйер қауымның таңдайын талай қақтырған қазақтың жас балуан қызы.
23-28 қазан күндері Грекияның Гераклион қаласында JIU-JITSU WORLD CHAMPIONSHIP 2024 әлемдік чемпионаты өтті. Ал оның U16-U18-U21 жастар категориясындағы додасына 46 елден 1621 жас спортшы қатысқан. Белгілі болғандай, олардың арасында балуанымыз Жібек Құлымбетова да бар.
Жібек әлем чемпионатына қыздар арасындағы U21 категориясы, Ne-Waza бөлімі бойынша (партерге жығып күресу) белдесуге қатысқан.
Чемпионат басталғаннан-ақ 48 келі салмақта өнер көрсетіп жүрген Жібек, әлемнің түкпір-түкпірінен жиналған қарсыластарын белдескенде бірден жер иіскетіп, жеңіске деген үмітсіз үйіне қайтарып отырған. Ақыры финал үшін күресте БАӘ-нің спортшысы Балкис Абдо Абдулланың орынын екінші қатарға бір-ақ түсірген.
Осылайша 17 жастағы қаршадай қыз Жібек Құлымбетова - Грекиядағы додада сөзсіз әлем чемпионы атанды.
Айтқандай, Жібек қуанышты хабарды әлеуметтік желідегі жеке парақшасында жеткізе отырып, Қазақ еліндегі жанкүйерлеріне алғысын да білдірген.
Jiu-Jitsu Ne-Waza бөлімі бойынша U21 жастар арасында Әлем чемпионы атандым. Аллаға шүкір!Менің салмақ дәрежемде Грекия, Израиль, Франция, БАӘ, Моңғолия, Украинадан келген мықты спортшылар жиналды. Барлық спортшы өз елдерінің үздіктері.
Бапкерім Самат Айтпанбет және Самат Рамазанов атындағы академияға рахмет!
Қолдау көрсеткен барша қазақ еліне алғыс білдіремін! Жеңісті күндеріміз көп болсын, Қазақ елі!🇰🇿, - деп жазды чемпион қыз.
Сурет: Грекияның Гераклион қаласында 11-жүлдені иеленген Жібек Құлымбетова / instagram.com/zhibek_bjj
Осылайша Жібек Құлымбетова жаһандық жарыстағы 11-ші алтынын алқалады. Дәлірек айтқанда, ол джиу-джитсу бойынша 8 дүркін, ал грэпплингтен үш дүркін жастар арасындағы әлем чемпионы.
Айта кетейік, жақын күндері Жібек тағы бір жарыста бақ сынамақ. Ол 15 қараша күні Әбу-Дабиде өтетін AJP (Abu-Dhabi Jiu-Jitsu Pro) әлем чемпионатында 12-ші алтын үшін белдеседі.