Тауға шығамыз деп үш жасөспірім адасып қалған
Іле Алатауының тауларында үш жасөспірім адасып кеткен. Бұл туралы smartnews.kz сайты хабарлайды.
2023 жылдың 15 тамызында үш жасөспірім таңертең тауға шығып, сағат 18.30-да ата-аналарына төмен түсіп бара жатқанын хабарлап, кейін телефон байланысы өшіп қалған. Сағат 00.15-те ТЖМ құтқарушыларына жас жігіттердің бірінің әкесі қоңырау шалған.
ТЖМ-нің баспасөз қызметінің дерегінше, туристер тобын іздеуге Республикалық жедел-құтқару жасағының жедел тобы шыққан. Сағат 4:35-те жасөспірімдер тобының бірі әкесіне адасқандары туралы хабарлама жазып, геолокацияны жіберген. Іздеуге туыстары қосылды.
- Сағат 08:25-те ТЖМ құтқарушылары Күмбел шыңынан балаларды аман-есен тауып алды. Ешкім медициналық көмекке мұқтаж болған жоқ. Жасөспірімдердің бірінің әкесі құтқарушыларға жұмысы үшін алғысын білдірді, - делінген ведомствоның хабарламасында.
Сондай-ақ тауға бір күнге болса да баратын туристерге ТЖМ құтқарушылары таулардағы қауіпсіз жүріс-тұрыс шараларын мұқият зерделеуді ұсынды. Құтқарушылар тауға жалғыз бармауға, өзіңізбен бірге GPS навигаторын алып жүруді ұсынды.