RUS
Бүгін Түркияның Ыстамбұл қаласында еліміздің туризм және спорт вице-министрі Серік Жарасбаев және V Дүниежүзілік көшпенділер ойындарын өткізуіне жауапты Наиль Нұров Дүниежүзілік этноспорт конфедерациясының президенті Біләл Ердоғанмен кездесті.
Кездесу барысында Серік Жарасбаев халықаралық маңызы бар іс-шараға дайындық жұмыстары мен ақпараттық-насихат шараларының қызу жүріп жатқанын алға тартты. Мереке маңызды болғандықтан, салтанатты шараның ашылу және жабылу салтанаты, сонымен қатар ойындардың өздері әлемнің жетекші телеарналары арқылы көрсетілуі қарастырылып жатқанын да атап өтті.
Жүздесу кезінде Біләл Ердоған екі тараптардың арасындағы қатынастардың жаңа деңгейге шықаннын атап өтіп, Қазақстанда өтетін көшпенділер ойны еліміздің этноспортын әлемге паш етудің жақсы жолы екенін айтты.
Сонымен қатар кездесуде Қазақстан делегациясының 16-18 ақпан аралығында өтетін Дүниежүзілік этноспорт конфедерациясының Конгресіне қатысатыны да нақтыланды.
Еске сала кетейік, 2024 жылдың 8-14 қыркүйек аралығында Астанада өтетін V Дүниежүзілік көшпенділер ойындарына 100-ден астам мемлекеттен 4000-ға жуық спортшы қатысады деп жоспарланып тұр. Биылғы ойындардың ұраны ретінде «Ұлы дала дүбірі» слоганы таңдалған болатын.
Автор: Ислам Достов