RUS
SMARTNEWS.KZ басылымының хабарлауынша, канадалықтардың қолында өскен Жандос ақтаулық анасын тауып, бауырларымен кездесу үшін Қазақстанға келген еді.
Басқа елде өскен Жандосты 10 айлығында Торонтода тұратын шетелдік отбасы асырып алған болатын. Олар ер жеткен ұлдарының қалауына қарсы шықпай, Қазақстанға алып келген. Ол 17 жылдан кейін ғана өз туған жеріне аяғын басып, анасымен тіпті бауырларымен қауышқан еді.
Отанына асырап алған ата-анасымен келген Жандосқа журналист бірнеше сыйлықтарды тарту етті.
«Араға 17 жыл салып, кіндік қаны тамған атамекеніне келген Жандосқа бағалы сыйлықтар жасадық. Ұлттық қолөнер бұйымдарын насихаттау, қазақ суретшілерін әспеттеу деген миссияларды да қоса атқарып жүргенімді білесіздер ғой.
Канадада жүрсе де Қазақстан жақын көрінсін, көрген сайын елі, жері барын білсін, деген ниетпен Жандос пен оның ата-анасына сый-сыяпат жасадық. Сұлтан Тілек мырзаның тақиясын кигіздік, ұлттық нақышта теріден жасалған бұйымдар бердік.
Түркістандық қолөнер шебері Мереке ханымның қолынан шыққан киізге басылған сурет, Алматының символы - апортын, мамасына қолдан тігілген қоржын тарту еттік. Папасына қазақы тақия кигіздік. Және менің сүйікті суретшім, қылқалам шебері Әлия Мұратқызының “Көшпенділер” деп аталатын, құны 2000 $ тұратын ғаламат картинасын ұсындық.
Сөйтіп, канадалық қонақтарға қазақтың дархан пейілін, қонақжайлылығын, жомарттығын, кеңдігін, қасиеті мен қадірін паш етіп, мейірім мен махаббатқа және сүт қатқан күрең шайға тойдырып жібердік», - деп жазды ол.
Сондай-ақ журналист Жандостың туған анасынан ажырап қалуына не түрткі болғанын бағдарламада ашып айтатынын жеткізді.
Бұған дейін Жандос Райанның ақтаулық туған анасы және бауырларымен кездескені туралы жазған едік.