RUS
SMARTNEWS.KZ басылымының хабарлауынша, Талғарда ұсталған Хасанның туыстары оның кінәсіз екенін айтып, президентіне бейне үндеу жариялады. Айтуларынша Хасан Қасымбаев ешкімге зиян тигізбеген адам.
Хасанның анасы мен жұбайы қылмыстық істі тергеу барысында объективтілікті талап етті.
“Құрметті Қасым-Жомарт Тоқаев Кемелұлы сізге үндеу жариялаймын! Менің баламның ісін әділетті шешіп беруіңізді, өз қарамағыңызға алуыңызды сұраймын. Менің баламды жазықсыздан жазықсыз қаралап отыр. Ешқандай кінәсі жоқ, соны дәлелдеп берсін! Департамент басшыларынан жауап күтемін. Сол үшін осы жерге келіп отырмын! Жау шабатын болса, Хасан бірінші ұстап тұрады. Ел үшін, жер үшін...”, – деді Хасан Қасымбаевтың анасы.
“Ол мал шаруашылығымен айналысады. Кішігірім бетон шығаратын зауыты бар. Ол туралы ақпарат жалған. Біреу айтты, қалғандарының бәрі соны қолдап тұр. Оны шынымен танитын адамдарға барыңыздар! Қандай адам екенін сұраңыздар! Біздің бірге тұрып жатқанымызға 15 жыл болды. Ол үш баланы тәрбиелеп отыр. Ал балаларына қалай психологиялық соққы тиіп жатыр?”- деді жұбайы.
Еске салсақ, "Хутор" бандасының жетекшісі деген Хасан Қасымбаев ұсталғаны туралы хабарлаған едік. Кейін Бас прокуратура қамаудың себебін айтты. Қасымбаев ережесіз жекпе-жек спортшысын аяусыз ұрып жатқан видеосы тарап, не үшін ұсталғаны белгілі болды.