RUS
Жасыратыны жоқ, көп жағдайда тұрғын үй компаниялары қарғыс естіп жатады. Алыстан мысал іздеп керек емес. Қазір MM Group компаниясының салымшылары байбалам салып, пәтерлерін ала алмай жүр.
Мәселенің мән-жайын түсіндіру үшін ММ Group басшысы Мөлдір Суюншали баспасөз мәслихатын өткізіп, журналистердің де, салымшылардың да сауалдарына жауап берді.
«Салымшылар қаражатын салған үйдің құрылысын Астана әкімдігі заңсыз деп таныды. Құрылыс жұмыстарының мерзімі шегерілетіні туралы тұрғындарға ескертілді. Біз келісімшарттағы уәделерімізді орындаймыз. Салымшылар ақшасын қайтарып алғысы келсе, бір тиынына дейін қайтаруға дайынбыз»,-деді Мөлдір Суюншали.
Жиында қоғамда қызу талқыланып жатқан сәбиін тербетіп таксиші болған Әсел Омароваға қатысты мәселе де көтерілді. Елорда тұрғыны осыдан екі жыл бұрын "BIZ BIRGEMIZ" қорының атынан өзіне Перизат Қайрат хабарласып, әйелге пәтер берілетінін айтып, үміттендіріп қойғанын жеткізді. Бірақ, осы уақытқа дейін баспанасыз жүр.
«Әсел сияқты 20 адам қайырымдылық қорларымен жасалған жоба шеңберінде тегін баспана алу бақытына ие болған еді. Нақтыласақ,«Асылхан» тұрғын үй кешенінен пәтер берілетін болады. Пәтер кілті қолына тигенше, осы уақытқа дейін Әсел Омарованың жалдамалы пәтер ақысын төлеп келген едік. Ютуб-арнаға берген сұхбатынан кейін ондай көмектен бас тарттық. Жалпы, Әселден бөлек 4 адамға осындай қолдау көрсетіп келеміз»,-деді М.Суюншали.
Байқағанымыз, компания басшылығы өз уәделерін орындауға ниетті. Тұрғындармен диалог орнатудан да қашып отырған жоқ. Астана әкімдігі тарапынан жер мәселесі оң шешімін тапса, салымшылар көптен күткен баспанаға ие болары сөзсіз.