Ақтаудағы ұшақ апатын дронға түсірген блогер бостандыққа шықты

SMARTNEWS.KZ басылымының хабарлауынша, блогер Азамат Сәрсенбаев Ақтаудағы ұшақ апатынан кейінгі жағдайды дронмен видеоға түсіргені үшін 10 тәулікке қамалған еді. Ол енді ғана бостандыққа шыққан. Бұл туралы Stan.kz жазды. 

Азамат Сәрсенбаев әкімшілік жазасын өтеп болған соң желіде пост жариялады. 

“Сәлем, 2025… Ер адамның басынан не өтпейді!?

Осы 10 күн оқшауланып, үйден 150 шақырым жерде мен тек осы сөздерді санамда қайталай бердім. Шынымды айтсам, мен бұл тәжірибеге қуаныштымын, өйткені мен өзімнің ұстанымдарыма бұрынғыдан да берік, күшті және иілмейтін болып кеткенімді сезінемін. Жалпы көп нәрсе жазғым келеді.

Бірақ алдымен әйелімді сүйіп, балаларымды құшақтап, ыстық душқа түсіп, жылы, жайлы ортада жақсы ұйықтағым келеді.
Қалғанын кейінірек айтамын...”, – деп мәлімдеді блогер.

Бұған дейін Азамат Сәрсенбаевтың адвокаты оның әрекеті арам пиғылды емес, қоғамды ақпараттандыруға бағытталғанын баса айтып, шешімге шағымданбақ болғанын жазған едік.