RUS
SMARTNEWS.KZ басылымының хабарлауынша, inDrive сервисі Астанада орын алған сорақы оқиғадан кейін қауіпсіздік талаптарын күшейтетінін мәлімдеді. Енді көліктегі флирт, танысуға тырысу секілді әрекеттер адам өміріне төнген қауіппен теңестірілетін болады.
Компания негізін қалаған Арсен Томский бұл мәселеге жеке өзі араласып, Қазақстанда әйелдерге қатысты дискриминация мен харассментке қарсы ауқымды медиа және мемлекеттік құрылымдармен (GR) жұмыс басталатынын хабарлады.
«Біз ережелерді күшейтіп жатырмыз. Тіпті қырындаудың өзі де өмірге қауіп төндірумен тең болады. Бұл — менің жеке басым үшін маңызды мәселе. Себебі мен — екі қыздың әкесімін», — деді Томский Threads желісіндегі парақшасында.
Оның айтуынша, әйелдердің қауіпсіздігі компания үшін басым бағытқа айналады. Бұл шешім Астанада орын алған жантүршігерлік жағдайдан кейін қабылданды: жолаушы қыздың алдында жүргізуші мастурбация жасаған. Жәбірленуші болған жағдайды видеоға түсіріп, полицияға жүгінген. Алайда құқық қорғау бөлімінде де оны қолдау орнына, бір қызметкердің орынсыз пікіріне тап болып, бұл тағы бір психологиялық соққыға айналған.
Оқиғаның соңы — 15 тәулік қамауға алумен аяқталды. Бірақ бұл жалғыз жағдай емес. Қарағанды облысында бірнеше әйел такси жүргізушісін қол жүгірту, сүйуге тырысу, тіпті тұншықтыру әрекеттері үшін айыптаған. inDrive платформасы арқылы жұмыс істеген бұл жүргізуші өзге біреудің құжатымен қайта тіркеліп, заңды айналып өтпек болған. Полиция оның кім екенін анықтаса да, қамауға алмаған. inDrive өкілдері бұзақының аккаунты өмір бойына бұғатталғанын мәлімдеді.