RUS
SMARTNEWS.KZ басылымының хабарлауынша, Премьер-министр Олжас Бектеновтің тапсырмасымен Ақтөбе облысының Әйтеке би ауданындағы Бөгетсай ауылы маңында болған жантүршігерлік жол апатының себептерін анықтау үшін Үкіметтік комиссия құрылды.
Бектенов комиссия мүшелеріне жұмысты дереу бастап, апаттың барлық мән-жайын мұқият тексеруді, сондай-ақ қаза тапқандар мен жараланғандардың отбасыларына алғашқы көмек көрсетуді тапсырды.
Комиссияға Премьер-министрдің орынбасары Қанат Бозымбаев жетекшілік етеді. Құрамына Ішкі істер, Еңбек және халықты әлеуметтік қорғау, Денсаулық сақтау және Көлік министрліктерінің басшылары, сондай-ақ Ақтөбе облысы әкімдігінің өкілдері енді.
Еске салайық, 23 қазанда Самара – Шымкент тасжолында, Белқопа ауылы маңында жүк көлігі DAF пен жолаушылар мінген «Газель» соқтығысып, бір мезетте 12 адам көз жұмды.
Полицияның алдын ала дерегі бойынша, жүк көлігі қарсы бағытқа шығып кеткен. Соққының күші соншалық, екі көліктің жүргізушілері мен «Газельдегі» он жолаушы оқиға орнында қаза тапқан.
Тағы бес адам түрлі жарақатпен ауруханаға жеткізілді. Дәрігерлер олардың жағдайын анықтап жатыр.