Астанада автобус есігі бала отырған арбаны қысып қалды

SMARTNEWS.KZ басылымының хабарлауынша, Астанада №54 бағыттағы автобуста бала отырған арба есікке қысылып, қауіпті жағдай орын алды. Жолаушының айтуынша, жүргізуші ескертуге қарамастан автобусты қозғалысқа келтірген.

Оқиға 2 қыркүйек күні «Рэдисон» аялдамасында болған. Елордалық тұрғынның айтуынша, ол баласын арбаға отырғызып, автобусқа мінбек болған. Сол сәтте салондағы жолаушылар арбаны көтеріп, көлікке кіргізуге көмектескен.

Алайда арбаны толық кіргізіп үлгермей жатып, жүргізуші есіктерді жаба бастаған. Әйел тоқтауды сұрағанымен, есік жабылып, арбаның алдыңғы дөңгелегін қысып қалған.

Жолаушының сөзінше, осыдан кейін автобус қозғалып кеткен. Қозғалыс кезінде арбаның дөңгелегі есіктен босап, бала отырған арба аударылып, жерге құлаған.

Әйелдің айтуынша, бала жарақат алмаған, бірақ қатты қорыққан. Ол оқиғадан кейін автобус тоқтамай, жолын жалғастырғанын мәлімдеді.

Оқиғаға байланысты елорда тұрғыны 109 қызметіне хабарласып, City Transportation Systems (CTS) компаниясына да өтініш жолдаған. Ол жүргізуші мен тасымалдаушының кім екенін анықтауды, автобустағы бейнебақылау жазбаларын тексеруді және оқиға куәгерлерін табуды сұрады.

CTS өкілдері қазіргі уақытта автобустағы бейнебақылау жазбаларын тексеріп жатқанын хабарлады. Компанияның мәліметінше, №54 автобус бағытына №7 автобус паркі қызмет көрсетеді.

Оқиға бойынша жүргізушінің әрекетіне қандай баға берілетіні тексеру нәтижесінен кейін белгілі болады.