Астана әуежайында Мәскеуден келген ұшақта бомба бар деген хабар тарады
Көліктегі полиция департаменті терроризм актісі туралы көрінеу жалған хабар беру дерегі бойынша қылмыстық іс қозғады.
SMARTNEWS.KZ басылымының хабарлауынша, Астана халықаралық әуежайында Мәскеуден келген ұшақ жарылғыш зат болуы мүмкін деген хабардан кейін тексерілді. Алайда әуе кемесінің салонынан бомба да, өзге де тыйым салынған заттар да табылған жоқ. Бұл туралы Көліктегі полиция департаменті хабарлады.
Ведомствоның мәліметінше, ұшаққа жүргізілген тексеру барысында күмәнді заттар анықталмаған.
Аталған дерек бойынша терроризм актісі туралы көрінеу жалған хабар беру бабымен қылмыстық іс қозғалды.
Қазір тергеу амалдары жүргізіліп жатыр. Полиция қызметкерлері күдіктінің жеке басын анықтап, оны ұстау үшін жедел-іздестіру шараларын қолға алған.
Бомба туралы жалған хабар бергендерге қандай жаза қарастырылған?
Қазақстан Қылмыстық кодексінің 273-бабына сәйкес, терроризм актісі туралы көрінеу жалған хабар берген адамға 5 мың АЕК-ке дейін айыппұл салынуы мүмкін. Бұдан бөлек, түзету жұмыстары, бас бостандығын шектеу немесе бес жылға дейін бас бостандығынан айыру жазасы қарастырылған.
Сондай-ақ кінәлі адам жалған хабарды тексеруге жұмылдырылған мемлекеттік қызметтердің шығындарын өтеуге міндеттелуі мүмкін. Бұл қылмыс үшін қылмыстық жауапкершілік 14 жастан басталады.
Материал авторы
