Қарағанды облысында кәмелетке толмаған қызды зорлаған 5 жасөспірім сотталды
Сотталушылардың барлығы қылмыс жасалған кезде кәмелетке толмаған болғандықтан, рақымшылық туралы заң негізінде жаза мерзімі қысқартылды.
SMARTNEWS.KZ басылымының хабарлауынша, сот айыпталушылардың әрқайсысын бес жылдан астам мерзімге бас бостандығынан айырды. Сондай-ақ олардан жәбірленушіге моральдық зиянды өтеу үшін 10 миллион теңге өндірілетін болды.
Қарағанды облысында кәмелетке толмаған қызға қатысты жыныстық зорлық-зомбылық жасаған бес жасөспірімге сот үкімі шықты. Тергеу мен сотта анықталғандай, олар алкогольдік ішімдікке масайған, дәрменсіз күйдегі қыздың жағдайын пайдаланып, қылмыс жасаған. Бұл туралы Қарағанды облысының қылмыстық істер жөніндегі мамандандырылған ауданаралық соты хабарлады.
Сот материалдарына сәйкес, оқиға 2025 жылғы 14 ақпанда болған. Сол күні кешке кәмелетке толмаған қыз құрбысымен бірге күзет қызметкерлеріне жасын айтпай, «Инфинити» түнгі караоке-клубына кірген. Екі қыз онда үш сағаттан астам уақыт алкогольдік ішімдік ішкен.
Кейін қатты масайған қыздар мұндай жағдайда үйлеріне қайтуға қорқып, таныстарының ұсынысымен оның достары тұратын пәтерге барған.
Сот анықтағандай, пәтерде жасөспірімдердің бірі жәбірленушінің есін жимауы үшін оған химиялық заттың буын иіскеткен. Осыдан кейін бес айыпталушы қыздың дәрменсіз жағдайын пайдаланып, оған жыныстық зорлық-зомбылық жасаған.
Іс бойынша жәбірленуші мен куәгерлердің жауаптары, сараптама қорытындылары және өзге де материалдар жасөспірімдердің кінәсін растаған.
Сот қандай жаза тағайындады?
Мемлекеттік айыптаушы сотталушылардың әрқайсысын 7 жыл 6 айға бас бостандығынан айыруды және екі жыл бойы педагогикалық қызметпен айналысуына тыйым салуды сұраған. Сонымен қатар 2025 жылғы 23 маусымдағы рақымшылық туралы заңды ескере отырып, жаза мерзімін 5 жыл 7 ай 15 күнге дейін қысқартуды ұсынған.
Жәбірленуші тарап прокурордың ұстанымын қолдап, моральдық зиян үшін 100 миллион теңге өтемақы өндіруді талап еткен. Ал қорғаушылар айыпталушылардың кінәсі дәлелденбегенін алға тартып, оларды ақтауды сұраған.
Сот қылмыс жасалған кезде бес жасөспірімнің де кәмелетке толмағанын ескеріп, бұл жағдайды жазаны жеңілдететін мән-жай деп таныған. Ал ауырлататын мән-жайлар анықталмаған.
Нәтижесінде әрқайсысына 7 жыл 6 ай бас бостандығынан айыру жазасы тағайындалып, педагогикалық қызметпен айналысуға екі жылға тыйым салынған. Алайда рақымшылық туралы заңға сәйкес, бас бостандығынан айыру мерзімі 5 жыл 7 ай 15 күнге дейін қысқартылған.
Жәбірленушінің азаматтық талабы ішінара қанағаттандырылды. Сотталған бес адамның барлығынан ортақ тәртіппен моральдық зиянды өтеу үшін 10 миллион теңге өндірілетін болды.
Сот үкімі әзірге заңды күшіне енген жоқ.
Материал авторы
