RUS
«Ғылыми Оскар» лауреаты: «Қазақтардың бірегей ДНҚ-сы бар. Ол Димаш Құдайберген және Күнсұлу Закария сынды талантты адамдардан байқалады»
Бұл туралы ол Астанада өтіп жатқан Nobel Fest ғылыми фестивалі кезінде мәлімдеді.
«Өздеріңіз білетіндей, мен өмірімнің көп жылдарын ДНҚ-ны зерттеуге арнадым. Мен бір нәрсені айтқым келеді – қазақтардың бірегей ДНҚ-сын көру үшін маған арнайы технологияның керегі жоқ. Оны Димаш Құдайберген, Күнсұлу Закария сынды талантты адамдардан байқауға болады. Францияда біз Қазақстан туралы көп естімейміз, бірақ COVID кезінде сіздердің QazVac вакцинасын шығарғандарыңызды естідік және таңғалдық. Сіздер оны бақылау үшін клиникалық сынақтар жүргіздіңіздер. Министр Саясат Нұрбектің сөзі маған қатты әсер етті, әрине, бұл француз министрлерінің сөзінен әлдеқайда жақсы», - деді ол.
Спикер өз сөзінде біз жасанды интеллект басқаратын және ақпаратқа сенуге болмайтын әлемде өмір сүріп жатқанымызды атап өтті.
«Қазірдің өзінде жасанды интеллектті қолданудың жаңа кезеңі басталып кетті. Ол адамдардың орынын ауыстыруда. Мысалы, жаңалықтарды, суреттерді өңдеп жатыр және жақын арада фильмдер түсіріледі. Рас, нақты жаңалықтар мен фейкті ажыратуда қиындықтар бар. Болашақ әлемінде сенім ең маңызды актив, ең маңызды элемент болады. Сіз көршілеріңізге, өзіңіз білетін адамдарға сене аласыз, бірақ жаңалықтарда, интернетте көргендеріңізге сене бермейсіз. Егер біз осы кедергілер мен қиындықтарды жеңе алмасақ, онда адамзатқа өмір сүру өте қиын болады», - деді ол.
Айта кету керек, Паскаль Майер ДНҚ талдауындағы революция жасағаны үшін ғылыми Оскар сыйлығын жеңіп алған. Оның техникасымен жоғары жылдамдықпен және айтарлықтай төмен шығындармен ДНҚ талдауларын жүргізуге болады. Мысалы, адамның алғашқы толық геномының реттілігі 2003 жылы, он жылдан кейін және 1 миллиард доллардан астам инвестициядан соң аяқталған. Паскаль Майер технологиясының арқасында бұл процесті енді бір түнде және 1000 долларға анықтауға болады.
Nobel Fest – халықаралық EdTech платформасы. Фестивальдің басты мақсаты – қазақстандықтарды білімге, ғылымға жəне инновацияға баулу. Nobel Fest жыл сайын 100 елден 500 000 қатысушы мен 500 университеттің басын қосады, жан-жақты білімнің ұзақ мерзімді дамудағы жəне жарқын болашақты қалыптастырудағы рөлі туралы талқы алаңына айналады.