RUS
Әлемнің әртүрлі елдерінен 3 мыңнан астам қатысушы жинаған іс-шарада ҚР Ғылым және жоғары білім министрі Саясат Нұрбек бірінші болып сөз сөйледі. Министр өз сөзінде жоғары білім беруді қайта құруға, әрбір қазақстандық үшін сапалы білім беруді қамтамасыз ету үшін қабылданатын шараларға егжей-тегжей тоқталды. Осы мақсатта ғылыми жұмысты жандандыру және қазақстандық университеттерді әлеуметтік-гуманитарлық білім мен мәдениетті сақтау орталықтарына айналдыру жұмыстары жүргізілуде.
«Біздің міндетіміз – «Study in Kazakhstan» брендін қалыптастыру, осы арқылы әрбір адам біздің білім беру кеңістігімізге қарап: «Мен Қазақстандағы АҚШ, Қытай, Корея, Германияның жетекші жоғары оқу орындарының дипломдарын ала аламын», – деп айта алуы керек. Біз қазір осы бағытта жеке бағдарламаны жүзеге асырып отырмыз. Жасанды интеллект және цифрландыру саласында да үлкен жұмыстар жүргізілуде. Оның аясында Қазақстанға шетелдік технологиялар трансферін жүзеге асыратын орталықтар ашылуда. Мұндай орталықтар Satbayev University, Yessenov University, Қорқыт Ата атындағы Қызылорда университетінде және басқа да жоғары оқу орындарында ашылады. Соның арқасында жоғары білім берудің бірыңғай платформасы жұмыс істей бастайды, екі университет — Satbayev University және Шығыс Қазақстан техникалық университеті цифрлық университеттің пилоттық жобаларын іске қосты», – деп атап өтті Саясат Нұрбек.
Сондай-ақ конференцияға Алматы қаласы әкімінің орынбасары Әсем Нүсіпова, Түркиядағы білім беру технологиялары саммитінің негізін қалаушы Ишыл Бой Ергуль, психотерапевт және психология бойынша көптеген кітаптардың авторы Бен Фурман, сонымен қатар Design Thinkers Group тобының негізін қалаушы және серіктесі Хорхе Родригес қатысты.
Конференция аясында сондай-ақ Гонконг педагогикалық университетінің президенті Чи-Кин Джон Ли және Саясат Нұрбек екі елдің – Гонконг педагогикалық университетінің қазақстандық жоғары оқу орындарымен ынтымақтастығы, Қазақстанда педагогикалық академия құру мәселелерін талқылады. Кездесу қорытындысы бойынша Қазақстан мен Гонконг арасындағы педагогикалық білім беру саласындағы болашақ қатынастардың негізі қаланды.
Конференцияның екінші жартысында «Университеттердің болашағы немесе жаңа сенімдерді қалай ақтауға болады?» атты ашық диалог форматында оқу процесінде жасанды интеллектті пайдалану, университеттерде білім беру бағдарламаларын жақсарту, жоғары оқу орындарын цифрландыру және трансформациялау, жаһандық рейтингтердегі көрсеткіштерді арттыру мақсатында ортақ көзқарасты дамыту мәселелері сөз болды.
Сондай-ақ ғылым мен технологияларды жетілдіру, IT саланы одан әрі жандандыру және білікті кадрларды даярлау тақырыптары қозғалды.
Саясат Нұрбек университеттерді қазіргі процестермен бірдей қарқынмен дамытудың маңыздылығын атап өтті.
«Бүгінде бүкіл әлемде және біздің елімізде университеттердің трансформациясы мен миссиясы туралы пікірталастар қызу жүріп жатыр. Білім беру саласында қызықты эксперименттер басталуда. Енді оқу орындарының жұмысы білім беру бағдарламаларын жаңартуға және кадрларды даярлау мерзімдерін оңтайландыруға бағытталған. Сұранысқа ие мамандарды дайындау жолдары ондаған жылдар емес, жеделдетілген уақытта қарастырылады. Цифрлық технологиялар, әсіресе жоғары білім беру саласында күн сайын өзгеріп отырады. Біз уақыт өте келе заманауи үрдістер мен талаптарға бейімделуіміз керек», – деп түйіндеді министр.
EdCrunch – білім берудегі жаңа технологиялар бойынша ТМД мен Еуропадағы ең ірі конференция, ол 10 жыл бойы T&D және L&D-мамандарды, әзірлеушілерді, педагогтарды, ата-аналарды және жұмыс берушілерді біріктіріп келеді, олардың бәрінің мақсаты бір – барлығы бірдей тең мүмкіндіктерге ие бола алатын әлем құру.