RUS
SMARTNEWS.KZ басылымының хабарлауынша, кешеден бері марқұм Шерзаттың әкесіне әлеуметтік желі арқылы ақпараттық шабуыл жасалып жатыр. Желіде Қаржаубай Нұрымовты қаралауға тырысатын бейнежазбалар көбейді.
Кеше әлеуметтік желіде үш бейнежазба тарады. Бірінші видеода Хутор ауылының тұрғындары Шерзаттың өліміне Хасанның қатысы жоғын айтып, оны қараламауға шақырды. Екінші видеода Хасан Қасымбаевтың өзі кінәсіз екенін, ешқандай бандаға қатысы жоғын айтып ақталды. Тіпті әлдебіреуге интервью бергенін де Youtube желісіне жариялады. Ал үшінші видео тергеу барысында айғақ боп табылатын "Қамажай" дүкенінің бейнежазба материалы. Оны Instagram желісінде алғаш болып Sonanews парақшасы жариялаған. Бірақ аталған парақша бейнежазбаны қайдан алғанын дереккөз ретінде көрсетпеген. Бейнежазба тергеу барысында айғақ ретінде табылатындықтан, материалды полиция қызметкерлерінің бірі редакцияға жіберді деген болжам пайда болды.
Желі қолданушылар аталған үш бейнежазбаның бір күнде, бірінен соң бірі пайда болуы кездейсоқ емес екенін жазды. Ал жәбірленушілерге құқықтық жағынан қолдау білдіріп жатқан Айтбек Амангелді болса, Шерзаттың әкесіне қоғамның көзқарасын өзгерту үшін әдейі камера бейнежазбасын жариялады деді.
"Естеріңізде ме, біздің сот өтіп жатқан кезде де осылай іске қатысты ақпараттарды әлдебіреулер қоғамның пікірін өзгерту үшін таратып жіберген еді. Міне, тағы да жәбірленушілерді кінәлі етіп көрсетуге тыраштанып жатыр.
Біріншіден, бейнежазбаның түпнұсқасына әлі талдау жасалмады, біреу іске қатысты материалды таратып жіберген.
Екіншіден, мұнда арасы 10 минут ішіндегі дүниелердің үзінділері ғана. Үзінділерде автор көрсеткісі келген кадрлар ғана бар.
Үшіншіден, бұдан да маңыздысы алкогольге мастық дәрежесінде көріп тұрмыз.
Төртіншіден, адам өлтіруді - ешқандай да ақтап алуға келмейді. Өз-өзін қорғамақ болды деген сөздің керегі жоқ", - деді ол.
Іске қатысты бейнежазба материалы заңсыз әлеуметтік желіге таралып кеткен соң марқұмның әкесі Қаржаубай Нұрымов әділдіктен күдер үзгенін, енді елден отбасын алып көшіп кеткісі келетінін айтып халыққа видеоүндеу жасады. Бұған да қатысты Айтбек Амангелді жазба қалдырып, марқұмның әкесіне қолдау білдірді.
"Қаржаубайдың сезімі мен эмоциясын түсінуге болады. Оларға ауыр соққы боп тиіп жатыр. Осы соққының бәрі оларға бірден кетіп жатыр.
Ақпараттық соғыс енді басталды. Екі күннен бері күдік туғызатын мақалалар шығып жатыр. Біз де оны көріп отырмыз. Бірақ әзір ол туралы ештеңе дей алмаймыз", - деді Айтбек Амангелді.