RUS
Бұған дейін Хасан Қасымбаевты полиция қызметкерлері ұстап әкеткенін жазған едік. Адам денсаулығына қасақана ауыр зиян келтірді деген күдікпен ұсталған ол сот шешімімен 2 айға қамауға алынды.
Бұл ақпаратты Алматы облысының Полиция департаменті таратты.
- Жедел-тергеу іс-шараларының нәтижесінде 2024 жылдың 2 қарашасында Қ. есімді азамат ұсталып, сот шешімімен 2 айға қамауға алу туралы бұлтартпау шарасы қабылданды, - деп хабарлады облыстық Полиция департаментінің баспасөз қызметі.
Естеріңізге салсақ, Бас прокуратура азамат А.Әлімовті ұрлау және ұрып-соғуға қатысты қылмыстық істерді қайта қарады. Қылмыс 2021 жылдың 17 маусымында Талғар қаласы Рысқұлов көшесіндегі «Виктория» кешенінің алдында болған. Белгісіз біреулер жәбірленушіні соққыға жығып, Audi-C4 көлігімен ұрлап әкетті. Ол дене жарақаттарымен орталық облыстық ауруханаға жеткізілді, дәрігерлер алдын ала «бас миының жабық жарақаты, мидың шайқалуы және екі жағынан параорбитальды гематома» диагнозын қойды.
Қылмыс 2020 жылы Еңбекшіқазақ ауданы Ават ауылында болған жанжалдан кейін кек алу мақсатында Хасан Қасымбаевтың нұсқауы бойынша жасалғаны анықталып отыр.
Қамауға алынған күдікті ұсталған күні оның анасы мен әйелі Тоқаевтан Хасанға көмектесуін сұраған еді.