Іш киімін шешуден бас тартқан сотталушыға қосымша жаза тағайындалды
Екібастұзда 8 және 13 жастағы апалы-сіңлілі қыздарды зорлаған еркек сотталған.
SMARTNEWS.KZ басылымының хабарлауынша, Павлодарда кәмелетке толмаған екі қызды зорлағаны үшін сотталған азамат колониядағы заңды талаптарға бағынбағаны үшін қосымша жаза алды. Ол тексеру кезінде іш киіміне дейін шешінуден бас тартып, қызметкерлерге қарсылық көрсеткен. Бұл туралы Irbistv.kz сайты жазды.
Оқиғаға қатысты сот материалдарына сәйкес, ер адам 2023 жылдың қыркүйегінде Екібастұзда екі апалы-сіңлілі қызға қатысты жасалған зорлық қылмысы үшін сотталған. Ол кезде қыздардың бірі 8, екіншісі 13 жаста болған. Қылмыс жасалған уақытта сотталушының өзі де кәмелетке толмаған еді.
Сот оған сегіз жыл бас бостандығынан айыру жазасын тағайындап, №46 мекемеге жіберген. Алайда колонияда ол ішкі тәртіпті жиі бұзатын сотталғандардың бірі ретінде сипатталған. Мәселен, сақалын алудан және кезекші ретінде баянат беруден бас тартқан.
2026 жылғы наурызда мекеме қызметкерлері қатаң жағдайдағы отрядта тексеру жүргізген. Алдымен бөлмелер тінтіліп, кейін сотталғандар жеке тексеруден өткен. Бұл рәсім кезінде олардан іш киіміне дейін шешіну талап етілген.
«Аталған сотталған адам шешінуден бас тартты, заңды талаптарды орындамады және агрессия танытты», – делінген Павлодар қаласының қылмыстық істер жөніндегі соты үкімінде келтірілген №46 мекеменің жедел бөлім басшысы орынбасарының жауабында.
Осы оқиғадан кейін сотталғанның талапқа бағынбау дерегі бойынша қылмыстық іс қозғалып, іс қайтадан сотта қаралды. Материалдарды, мінездемелер мен куәгерлердің жауаптарын зерттеген сот оның кінәсі дәлелденді деген қорытындыға келген.
Нәтижесінде ер адамның жазасына тағы бір жыл алты ай қосылды. Ол жазасының қалған бөлігін барынша жоғары қауіпсіздік деңгейіндегі колонияда өтейтін болды.
Материал авторы
